Kya Insha Ji Sodai hain? full Ibn-e-Insha urdu Poem

Ye batain jhoti batain hain ye logon ne phelai hain

Tum Insha ji ka naam na lo Kya Insha Ji Sodai hain?

Hain lakhon rog zamanay main, Kyon ishq hai ruswa bechara

Hain aur bhi wajhein wehshat ki, insan ko rakhti dukhyara

Haan bay-kul bay-kul rehta hai, Ho pait mein jis ne dil hara

Pr shaam se le kar subah talak koun phiray ga awaara?

Ye batain jhoti batain hain ye logon ne phelai hain

Tum Insha ji ka naam na lo Kya Insha Ji Sodai hain?

Ye baat ajeeb sunatay ho, Wo dunya se be-aas howe

Ek naam suna aur ghash khaya, Ek zikr pe aap udaas howe

Wo ilm main aflatoon sunay, Wo shair main Tulsi das howe

Wo tees baras ke hotay hain, Wo BA MA pass howe

Ye batain jhoti batain hain ye logon ne phelai hain

Tum Insha ji ka naam na lo Kya Insha Ji Sodai hain?

Gar ishq kiya hai tab kya hai, Kyon shaad nahi abad nahi

Jo jaan liye bin tal na sake, Ye aisi bhi uftad nahi

Ye baat tu tum bhi mano ge, Wo Qais nahi Farhad nahi

Kya hijr ka daaro mushkil hai? Kya wasl ke nuskhay yaad nahi?

Ye batain jhoti batain hain ye logon ne phelai hain

Tum Insha ji ka naam na lo Kya Insha Ji Sodai hain?

Wo larki achi larki hai, Tum naam na lo hum jaan gay

Wo jis ke lambay gaisu hain, pehchaan gay pehchaan gay

Haan saath humare Insha bhi uske ghar mein thay mehman gay

Par us se tu kuch baat na ki, anjaan rahe anjaan gay

Ye batain jhoti batain hain ye logon ne phelai hain

Tum Insha ji ka naam na lo Kya Insha Ji Sodai hain?

Jo hum se kaho hum kartay hain. Kya Insha ko samjhana hai?

Us larki se bhi keh lainge, Go ab kuch aur zamana hai

Ya chorein ya takmeel karain, Ye ishq hai ya afsana hai?

Ye kesa gorakh dhanda hai, Ye kesa tana bana hai?

Ye batain jhoti batain hain ye logon ne phelai hain

Tum Insha ji ka naam na lo Kya Insha Ji Sodai hain???